Thursday, January 26, 2023
Niz Goenkar
Latest News

Zanttim Amkam Kiteak Molachim? – Bor: Jose Salvador Fernandes
Saturday - Jan 7, 2023
Zanttim Amkam Kiteak Molachim? – Bor: Jose Salvador Fernandes
Zanttie piraien ventoll ghala hacho faido gheun, duensan tea bapaik chopkeak dhorlo. To azun-ui tea duensachea chopkeantlean suttonam. Tachie piraiecho niall kelear, to fuddem suttcho-i nam. Punn tachie familik – putak ani sunek – mat to hea sonvsarantlo, zata titlie vegim suttlolo zai. Kiteak tankam tachea zantteponnachi ubgonn ailia. Tachem duens apnnacho suseg ibaddta oxem tankam dista. Dekun, putan ani sunen taka, maltratar korunk suru kelam.

Ghorabeacho vhoddil aslolea tea zantteak, tachi zantti pirai ani duens taka uttun bosunk dinam, boslear ubo ravnk dinam, ani ubo ravlear, osoktaiechea danddean taka khala apttunk pattim ravonam. Oxie poristhitint, tacho put-sun sabar karonnanchem nimit diun, taka zhoddpaunk pattim soronant. Kuddichi arr zalolea tea bapayk jevonn legit bhorounk, tanche hat mukhar soronant! Amchea Goeant khubxea ghorabeamni osli poristhiti vosta. Tantuntloch ho-ui ek ghorabo.
 
Nentteank khoim zantteanchem mol somzonam. Dekun tim zantteank, mol naslolea porim tratar kortat. Tanchi besarmai kortat. Tanchem sangnnem aikun ghenant. Tanchea onnbhovak man dinant. Tanchea monisponnak man dinant. Punn, nentteamni hea zantteank kiteak aikunchem? 
 
Ghorabeantlim zanttim, jivitbhor moza marunk bhair asonant. Tim amchea ghorabeantuch, ghorbeachim vangddi astat. Ghorabeachim vangddi mhonntoch, tankam ghorabeantlea vangddiancho mog, tenko, borem utor, bori vagnnuk, apleponn ani bori seva mellunk favo. Kiteak, apnnachea angant tank asli tednam, hem sogllem tannim amkam amchea bhurgeaponnar dilem. Atam tanchie zanttie piraier, tankam hem sogllem porot diunk zai. Ani tim-ui hie piraier amche kodde tench anvddetat.
 
Monis zantteponnar pavtoch, nentteank polloitnam, to onnbhovachim oklam ghalun polleta. Dekun, onnbhov naslolim nenntim, ‘aili fur, mumrant pur’ korunk toiar zatat tednam, him zanttim tankam, kitem sarkem, ani kitem sarkem nam, khoinchie poristhitint koxem fuddem vechem ani khoim pattim sorchem, hem sogllem tim piraiechea onnbhovan sangtat. Onnbhov mon’xak jivitachim jim sotam xikoita, tem dusrea konna koddech xikounk zainam. Dekun zantteanchea girest onnbhovak man diunk favo.
 
Ami jitlim vaddot-vaddot vetanv, titlim ami zantteponnak, ani zantteponna udexim mornnak lagim zatanv. Zanttie piraier pavlolea mon’xancho hea sonvsarant chodd vell, chodd vorsam ani kall uronam. Ek pavtt tancho ho vell somptoch, tim amkam mellonant. Dekun, tanchie jivitachie amur-pike sanjer, tankam chodd mog zai asta; tankam apleponn zai asta; ghorabeantlea mon’xan tankam apnnacher chodd mon ghalolem (attention) zai asta. Tanchea zantteponnar tankam hem mellta tednam, tim khuxal ani dhados astat. Mortanam legit tim dhadoskaien mortat.
 
Zanttie piraier mon’xam sompeponnim duent zatat, hem sot. Kiteak, apnnak zalolea duensak kuddintlem bhair ghalunk, tanchie kuddint boll asonam ani uronam. Kudd osokt asta dekun, tim tea duensam add zhuzunk unnim poddtat. Ami lhan asleanv tednam, amkam duensam zatalim. Tea duensam add zhuzunk, hinch, az zanttie piraier pavlolim amchim ghorchim, apunn amchi takot ani ghottai zatalim. Ti takot ani ghottai tim amkam voizuki zotnai gheun ditalim. Dekun zanttie piraier tim duent zatat tednam, ami tanchi ghottai ani takot zaunchi mhonn, tankam amche koddchean anvdde astat. Mhonntoch, tanchi pidda bon’d korunk nhoi, punn addaunk tori, voizuki nodrentlean tanchi soglli zotnai ghevop, hi amchich zababdari asta. 

Back
No comments posted...
Leave a Comment
* Name
* Email (will not be published)
*
* Enter verification code
* - Required Fields