Deprecated: mysql_connect(): The mysql extension is deprecated and will be removed in the future: use mysqli or PDO instead in /home/nizgoenk/public_html/library/database.php on line 3
NIZ GOENKAR
Tuesday, June 27, 2017
24 Jun Bebdeank Bhettoilolo Dis? - Bor: Lino Dourado
Saturday - Jun 17, 2017
24 Jun Bebdeank Bhettoilolo Dis? - Bor: Lino Dourado
Ticho nosto toxea tosoch mezaruch aslo. Sokallcho ‘almoŅ«o’ pottant domxilea xivai ti konnakuch lokx divpi nhoi asli. Bhukecho upas korun itlea zoran konna thaim koslia gozalimni ‘ocupado’ asa tem zannam zaunk, tichexim gelea viret kollchem naslem. Sokallinch fonar boddboddunk laglia. Ticho ghorkar Lapitt purnnponni gondollant buddlo. Koslea-i tori kama khatir taka bhair sorunk zai aslem. Tia khatir, fer’rak khomis dilolem tem legit kodelir fer’rachi gormi chakunk poddun aslem. Bhair sorunk taka vell zatolo. Fer marunk dilolem khomis melltolem vo nam hem vicharunk ticheaxim lagim zalo tednach, tacho mobail fon vazlo. Kama khatir mellunk zai aslolea ixttacho fon aslo.
 
“Thoddea vellan pavttam’, Lapittan hatachie goddialicher nodor marit sanglem.... “Kitem? Hanvem eupachi goroz nam? Kam’ zalem?...Khorench?....Nam nam. Mhozo dis pirddear korunk nam tunvem. Disachi survat atam suru zavpachi asa...”, Bhitorlea ‘landline’ fonnacher uloitolie ghorkarnik pollet Lapittan mhonnlem.
 
“Tuka khobor nasli? Vell’lliechea sarpanchan eke bailchea mostokar mutt marun mostok foddlem mhonn? Facebook-ar nettan gazta hi gozal. Koslem murkponn hea papiachem?”Dusrie vatten ‘landline’ fonacha speaker-avelean, ekdom sonnsonnit uloitolie ostoriecho avaz Lapittachea kanancher bostalo. Tabortob avazachi vollokh patvali. Kolej ixttin Emelda kodde rajki khobrancho vixoi chalu kelear, Lapittachie ghorkarnik kitlo vell zala tacho sumar kolloch naslo.
 
“Ema, (aplie ixttinnik mottvea nanvan ulo marun) matxe fon ‘hold’ kor am! Amcheak kitem zai tem vicharta” Tichea samkara Lapitt ubo aslolo polleun tinnem mhonnlem
“Naka naka. Tumi uloiat. Mhozo ixtt Gasparichem kam’ zalem. Hanv bhair vochonam. Matxe ‘email’ polletam mhozo”. Bazuchea mezar aslolo ‘desktop’ kompiuttor chalu korun kodelir boslo.
 
“Eka thaptak so mhoinem kadoi. Muttik kitle mhoineanchi bondkhonn kai? Lapittachi ghorkarn Konsun, Emelda kodde gombhirtaien vicharlem.
 
“Padd poddum tanchem. Kitem khaunk zhogoddtat devak khobor. Chorun-chorun xaram kabar keliant, ani atam ganvui pokrunk lagleat. Ani amchim festam legit luttunk sodtale.”
Koslim festam luttunk lagle mhonntai tum?”, Konsun vicharlem Tuka khobor nam? Junache 24ver Sam Juanvachem fest mhonn? Ani kitem kai mhonnlear 25ver Panchayatichio vinchnnuko dovrunk tharailolio
 
Tor kitem zalem? Festak ani vinchnnukek koslo som’bond asa?” Koslo som’bond asa?” Tum kitem uloitai ia! Edem vhoddlem poromporik Goenkaranchem fest sukear poddpachem”
 
“Sukear? Ani koxem?”
 
“Sam Juanvanchea festa somoiar baient uddio marpachio. Amgeliachie nanv João. Tea disa ‘happy birthday’ tachi. Padrinhochem fest borench koddok korta to. Vinchnnuko 25 Junak ghevpachem tharailolem mhonn, amcho ekdom’ bejarlolo”
 
“Sam Juanvanchi zolmachi porob Junache 24 tarkeruch zata. Ti bodlunk zainam. Dusrea disa Panchayatichio vinchnnuko ghevpachio tharailiar, konnank addkholl zatali?”
 
“Samkem tum ia! Kainch noko zalolea porim korta. Vinchnnukichea adlea disa ani vinchnnukie uprant soreacher bondi asta. Soro vikunk zainam. Soro nastonam Sam Juanv sobta? Baient uddio marunk zata? Baient uddoilolio sorea battlio voir haddunk, amcho kapaz. Aikunk nam tunvem sorgest C. Alvaresachem ‘Sam Juanv’ kantar. Oslim festam vorsak don pavtti kiteak enam….?”
 
“Dor vorsa Sam Juanvacho festa disa ek vo don usolltatuch. Vorsak don pavtti porob ailear bebdikaiechim mornnam vaddtolim tuka disonam?”
 
“Ponn tem kantar…..”
 
“Gomlem mhaka tum kitem sangonk sodtai tem. Kantar boroitoleak, Povitr Sobha vorsak don pavtti Sam Juanvachem fest somarombhta mhonn khobor nasli. Junachi 24ver tacho zolmancho dis, ani Agostache 29ver tachea mornnachi porob somarombhta”
 
“Khorench tuka dhormanchi zaiti zannvai asa mugo”, Emaldan, Konsunchie zannvaiechi thoknnai keli
 
“Nemallim vachlear kollta nhoi tem? ‘Vavraddeancho Ixtt’, ‘Dor Mhoineachi Rotti’ atanchi pillgi khoim vachta? Asum ti gozal. Hanv kitem sangum sodtam? (chintun) Ham! Sam Juanvan aplea avoichea kusveant uddi marloli mhonn ami baient uddkio martanv zalear, Herod raza vaitt kortalo tem, Sam Juanv tachea tonddar martalo tie toren ami, amche fuddari vaitt kortat mhonn tanchea tonddar marpacho dis Agostachea 29 tarik kiteak tharaunchi nhoi? Asa amkam kaposdad? Santachea nanvan fokot bebdikai?”
 
“Bori huxar tum am! Mornnancho dis konn konnacho palta?”
 
“Ooh! Atam somzolim hanv. Sam Juanvachea nanvan bebdikai korunk zai mhonn Junachie 25ver vinchnnukio korunk tharailolio tio, Junachie 11ver dukoll’lio.. Khoinsor boroilolem vachlam tunvem Sam Juanv bebdikai kortalo vo soro pietalo mhonn? Kristi dhormachi khebaddam konn korta? OKristi lok? Ami Goenkar Kristanv lok, sorea vinnem festam-porbo monounkui fuddem asat mhonn dusrea dhormanchea lokak dakounk amkam ek sondi mell’loli. Vinchnnukechi tarik bodolunk konnank zai asli zannam-i tum? Vhodd vhodd panch nokhetri hottelam ani Casino choloitoleank. So mhoine adinch kruttamni duddu moddun tanchio euzonno suru zatat, girest pavnne mouza bhogunk Goeant lottun etat ani vetanam Sam Juanv, Kristanv bebdeancho sant mhonn chukicho somoz kortat. Khorench, Junachie 25ver vinchnnuko tharailolio zalear ho tancho ‘commercial festival‘ bon’d zavpacho ani khoro orth Sam Juanv festacho okristi bhailea bhonvddiekarank somzopacho…atam tuka koll’lem mu? Ema….Ema…Hai saiba! Hacho fon kednam bon’d poddlolo kai?

Back
Comments (1)
dlp
Sunday - Jun 18, 2017
Hem soglem mojea khodd'ddea voilean ghelem. Punn kaim nezo. Viva San Juanv. Viva Bebde! Fuloi! Fuloi!! Anv il'lo ghetam re, tum il'lo ghe re, Faleam kaim mevonam. Oslim Festam vorsak kiteak don pauttim enam.
Leave a Comment
* Name
* Email (will not be published)
*
* Enter verification code
* - Required Fields