Wednesday, May 24, 2017
Romi Konknnicho Vell Pikla… Punn Fuddari Azunui Tornnech Asat! – Bor: Jose Salvador Fernandes
Monday - Aug 17, 2015
Oi! Romi Konknnicho vell pikla! Sarkoch pikla! Kednam? Atam! Az! Hea disamni! Fattlea tin-chear satolleamni! Goeant mullavem xikxonn Konknni (Devnagori lipientlean) vo Moratthi bhaxentlean zata taka Goencho sorkar onudan dita. Goeant, Igorjechea ‘Archdiocesan Board of Education’-a khal jea iskolamni mullavem xikxonn Inglez madyomantlean zata, taka-i sorkar onudan dita. Inglez madyomantlean cholpi mullavea xikxonnak toxem onudan diunk sod’deachea sorkaran adinch nirnnoi ghetlolo. Inglez madyomantlean cholpi mullavea xikxonnachea onudanacho fuddar surokxit korchea hetun, mhonnche fattlea mhoineachea xevttak, Goem Vidhan Sobhechem pavsallem odhivexon zaunchem aslem tea disamni, ‘Forum Of  Right To Children’s Education’(FORCE) hea zomean upas korun ani roste addaun, to nirnnoi sorkaran kaido mhonn pas korunk sorkaracher ddobav haddpacho iotn kelo.
 
FORCE-achea hea proitnak addambo ghalunk, rokddoch Bhaxechim Bon’ddolam Sangpi Manch (BBSM) ho, communal’ ani khottea hetuncho zomo nidentlean zago zalo. Bhurgeanchem mullavem xikxonn hangachie thollavie bhaxentlean, mhonnche Konknni (Devnagori lipientlean) vo Moratthi bhaxentlean zainam zalear, bhurgim lhananchim vhodd zatanam tim hangachie sonvskrutaie pasun pois vetolim. Dusrea utramni, Igorjechea iskolamni mullavem xikxonn Konknni (Devnagori lipientlean) bhaxentlean zainam zalear, bhurgim bhaxe ani sonvskrutaie pasun pois vetolim. Tacho magir Konknni bhaxek ani hangachie sonvskrutaiek mar bostolo, oxem BBSM-achem chintop ani sangnnem asa.
 
Goeant, Romi lipientlean Konknni khatir vavurpi zaiteoch sonvstha asat. Hantuntlea thoddea sonvsthank toxem vavrunk sorkarachem onudan mellta, ani thoddeank mellonam. Goeant hea fattlea disamni, mullavea panvddear xikxonnachea madyomacher itli khor bhasabhas ani boball chol’la astanam-i, hea sonvsthank hea vixoiacho matui vichar ani husko nam mhonn disun eta! Karonn, Romi Konknnichea mukhel ani barik-sarik sonvsthamni legit, Romi Konknnicho fuddar dolleam mukhar dovrun hea vixoiacher gom’bhir ritin vichar kelolo, tacher bhasabhas keloli ani tea vixoiak dhorun Romi Konknnichea borea fudddara khatir kitench xizoilolem disonam. Hantuntlean, Romi Konknni sonvsthanchea podancher ravun miroitolea Konknni fuddariank, Romi Konknni khatir fuddarachi nodor nam mhonn porot ek pavtt thavem zata!
 
Bhurgeanchem mullavem xikxonn Konknnichie Devnagori lipientlean zalolem bhurgeanchea avoi-bapaink naka. Karonn, mullavea panvddear iskolami Devnagori lipientlean Konknni xikoitat ti eka vixixtt somazachi boli. Tea somazantlea khottea monanchea mon’xamni, Konknnichea nanvan Devnagori lipientlean ti boli ‘Archdiocesan Board of Education’-a khal choltolea iskolamni thapli. Karonn tankam Devnagoricho ani aplie boliecho fuddar surokxit urlolo zai aslo. Az ti lipi nhoi mhonn ti boli, iskolamni xikpi bhurgim ani tanchim avoi-bapui mandunuch gheunk toiar nant. Ani ‘Archdiocesan Board of Education’-achea iskolamni Konknnichi hi thaploli lipi ani boli nam zalear, tika fuddar aschonam mhonn BBSM-ak bori khobor asa. Dekunuch ho Manch, sorkar Inglez xallank ditolea onudanak virodh korta. (Toxem polleunk gelear, sorkaran khoinchea-i madeomantlean cholpi mullavea xallank onudan kiteakuch diunk zai, ho prosn vegllo asa.)
 
Bhurgim Konknnichie Devnagorintlean xikunk sodinant. Bhurgeanchea avoy-bapainkui ti Konknni, sodam uloitat tie Konknni poros veglli ani kotthinn lagta. Oxie poristhitint, bhurgeank iskolamni mullavea panvddear Romi Konknnintlean xikxonn dilear, bhurgeancho xikxonnacho ani madyomachoi prosn suttavo zatolo. Itlench nhoi, Romi Konknnintlean zatolea xikxonnak lagun Romi lipientlean Konknnicho fuddarui mozbut zatolo. Mhonntoch, hie nodrentlean kholaien vichar korun, iskolamni bhurgeank Romi lipientlean Konknni xikouncho prostav, Romi Konknnichi mukhel ani her sonvstha sorkara mukhar kiteak manddinant? Iskolamni xikounchim sorkarachi maneotai aslolim patth-pustokam toiar zaum meren, sod’deak bhurgeank iskolachea vella bhair Romi Konknni xikounchi khuxi, umed, tank, ievzonn Romi Konknnichie mukhel sonvsthe soit her sonvstha sorkara mukhar ugti korunk kiteak fuddariponn ghenant? Iskola bhair bhurgeank Romi Konknni xikounk goroz aslolim patth-pustokam zannkarank gheun toiar korunk, Romi Konknnichi mukhel sonvstha Romi Konknnichea her sonvsthank sangata gheun pavlam ubarunk azunui kiteak fattim ravlia? Iskola bhair Romi Konknni xikounk, Romi Konknnichi sari-puri zannvai aslolim xikovpi toiar korpacho vavr, Romi Konknnichie mukhel ani her sonvsthank ektthaim eun, kiteak hatant gheuncho disonam?
 
Sonvsarant kankrachie pidden lok morta, tachea poros chodd lok dhormank lagun morta. Ani torui ami kankrachi pidda bori korpachem vokhod sodunk bhonvtanv. Az Goeant Romi Konknnichi poristhiti oslixi kitem zalia. Az Goeant jivo-jito aslolea xikxonn madyomachea vixoiacher chit thiraun, ani tea madyomantlean Romi  Konknnicho fuddar mozbut korpacho chotraien ani gom’bhirtaien rosto sodchie bodlek, Romi Konknnichio mukhel ani her sonvstha, ani tea sonvsthanche tornnea vicharanche fuddari,  apunn lokachea dolleamni bhortat toslim festam korunk bhonvtat! Fuddarachi nodor naslolie poristhitichi hi ani ek dekh.
 
Aichea mullavea xikxonnachea madyomavelean Romi Konknnicho kall pikla!
Sam’ko pikla! Mullavea xikxonnachea madyom’ prosnan, Romi Konknni khatir dar ugtem kelam, punn tea darachi chavi Romi Konknnichio sonvstha cholovpi ani tea sonvsthancher tabo dovorpi fuddarianchea hatamni dilia. Dekun, tannim Romi Konknnichea mozbut fuddara khatir aplem mon rund korun vichar korpachi atam goddi upraslia. Romi Konknni khatir fuddarachi nodor apnnaun, Romi Konknnicho kholaien niall ani bhasabhas korun, Romi Konknni khatir tannim aple vichar pikovpachi nibel goroz asa. Romi Konknnicho kall pikla tie goddiek, Romi Konknnichea sonvsthamni ani tea sonvsthanchea fuddariamni tornnech vichar gheun boslear koxem zatolem?
 
Oi! Romi Konknnicho kall pikla!
Sam’koch pikla! Romi Konknnicho fuddar mozbut korpachi goddi Romi Konknnichea Sonvsthanchea umbrear, ani tio sonvstha cholovpi tornnea vicharanchea fuddarianchea mukhar eun ubi ravlia. Romi Konknni khatir fuddarachi nodor nastanam-I sonvsthechea podank chikttun boslolea   Romi Konknnichea fuddariamni, Romi Konknnicho ho piklolo kall fukott vochunk diunk zainam. Kiteak, Romi Konknni atam tokli voir kaddinam zalear, fuddarak ti kednanch kaddchinam. Ani toxem zalem zalear, sod’deachi ani fattlean ievpi Romi Konknnichi pillgi, sonvsthanchea panvddear nanvam purtim podam gheun boslolea Romi Konknnichea fuddariank kednanch bhogxichinam! Sonnvarachim Sungttam
 

Back
Comments (1)
Lazar (DLP)
Thursday - Aug 20, 2015
Amchea fuddareank amim forsan pikounk galunk zai, oxem maka dista.
Leave a Comment
* Name
* Email (will not be published)
*
* Enter verification code
* - Required Fields