Wednesday, May 24, 2017
Romi Konknnicher Kiteak ‘Maldisanv’ Poddlam? – Bor: Jose Salvador Fernandes
Sunday - Jul 12, 2015
1987 vorsa Goencho Rajbhas Kaido Devnagori lipiechi saddi nhesoun pas kortoch, Romi Konknnicher onit zali mhonn Romi lipientlean Konknni kodde jiva-bhavacho som’bond aslole choddfoddle ani dukovle. Tea uprant, ‘Romi Konknnicher onit zalia’ ho vixoi gheun rajkornniamni aplem sadoilem, thodde azunui sadoitat ani kaloitat. Goencho Rajbhas Kaido Devnagori lipiechi polli thapun pas kortoch, Romi Konknnichea bhoktamni, ani Rajbhas Kaideachie chollvolli vellar Konknni Porjecho Avaz-ant (KPA) asunui Romi lipiek ghat kelolea Romicheach mon’xamni, sorkarak ani Devnagorivaleankui gallio ghalio, ani azunui ghalit asat. Rajbhas kaido pas zaun az 28 vorsancho lambdik kall sorlo. 28 vorsam adim Romi Konknnicher Romi add asloleamni onit kortoch, Romi Konknnichea fuddariamni, borovpiamni ani Romi Konknnicho husko ani umed asloleamni fattlea 28 vorsanchea kallant ektthaim eun, az Romi Konknnicho okhondd ekvott toiar zaunk naka aslo? Hea ekvottantlean Romi Konknni surokxit asun, Romi Konknnichea pattlavdaranchie dittaientlean tinnem udorgoticho panvddo ganttunk naka aslo? Zai aslo mu? Punn Romi Konknnichea mollar azunui ti poristhiti ani dis sodd, tachi savlli nhoi mhonn tie savlliechi zollokui disonam. Kiteak?                 
 
•           Romi Konknnichea mollar fuddarponn nam.
 
•           Romi Konknnichea mollar fuddarponn choloitoleam kodde fuddarachi nodor nam.
 
•           Romi Konknnicho fuddar bhurgeancher adarun asa. Bhurgeank iskolamni Romi Konknni xikoili zalear Romi Konknnichi buniad ghott zata. Tea fuddem vochun Romi Konknni kolejimni ani Goem Vidyapitthant porian xikoilear, Romi Konknni mozbut zata. Punn Romi Konknnichea fuddariank hea soglleachie buniadicho poilo fator bosovpachi nodoruch nam dekun hie babtint azunui kainch zaunk nam.   
 
•           Romi Konknni mollavelea fuddariam ani Romi Konknnichea her mon’xam kodde Romi Konknni khatir vavurunk zai asloli umed nam.
 
•           Romi Konknnichea mollar fuddarponn choloitoleank Romi Konknnichem misanv soddun, ‘publicity’ soit her sogllem lagta.
 
•           Fuddarachi nodor nasunui Romi Konknnichea mollar itlo kall podvio samballpi fuddariank, jivitbhor teach-teach podank chittkun ravpachem, kurar zainam toslem duens zalolem asa.   
 
•           Sonvsthanchea panvddeavelea Romi Konknnichea fuddariank Romi Konknni Rajbhas Kaideant ghalunk fuddarponn ghevpachem mon nam. Halinch, Romi Konknnichie eke mukhel sonvsthechi zomat zaloli tantum tie sonvsthechea eka odhikarian toxem spoxtt ritin sobhemazar sanglam-i bi! Dusrea utramni, Romi Konknnichea fuddariamni Romi Konknnichi chollvoll pon’char (puncture) kelia.
      
 
•           Romi Konknnichea fuddariank Romi Konknni samballchea poros, Romi Konknnichim podam samballop ani tea podam khustar mirovp chodd avoddta.
 
•           Romi Konknni mollavelea fuddariank ugtem mon nam.
 
•           Sonvsthanchea panvddear Romi Konknnichim podam samballpi monis, aplea faidea khatir apnnem toiar kelolie faskie bhitor ravtat tankam dhumpaitat, ani ‘constructive criticism’ korpi Romi Konknni mon’xamni aplo ‘ego’ dukoila mhonn tancho rag xizoitat.    
 
•           Romi Konknni mollavelea mon’xam modem, visvasa poros dubav chodd vosta. Dekun hea mollar sompeponnim konn konnak patienam. Hea mollavele fuddari apliach savlliank bhietat, ani tea savlliank dubavachim voklam lavun polletat!  
 
•           Romi Konknnichia thoddia sonvsthanchea fuddariamni apnnak ‘Puroskar’ diun vo her sabar rupamni ‘upkar’ keleat ani kortat oxem Romi Konknnichim thoddim borovpi mandtat. Dekun tim borovpi, tea sonvsthamni cholpi sot-koddu gozali khobor asunui moneponn samballun, onitichea gulamaponnant dhadosponn bhogtat.
 
•           Romi Konknnichia kaim sonvsthanchea fuddariamni ani odhikariamni, Romi Konknnichea thoddea borovpiank viktim-i ghetliant. Dekun tea borovpiamni ‘hanv kitench vaitt pollenam, hanv kitench vaitt aikonam ani hanv kitench vaitt uloinam’ dhoronn apnnailam. Svota chintpi ani borovpi aplem mon ani monachem meklleponn dusreachea ghannant dovrunk mou poddta tednam taka koso/koxi/koxem borovpi mhonnum eta?       
 
•           Romi Konknni mollavele kaim borovpi fokot ‘paper tigers’ zaun gorodd ghaltat. Romi Konknnichea boreponna khatir soeg mellta tednam te uloinant, ani korunk zai tio vevharik (practical) gozali korunk fuddem soronant.
 
•           Romi Konknni mollavelea thoddia borovpiank Romi Konknnichea mollar aplea fuddariank lagun cholpi oniti add tallo ubarpacho dhir nam.
 
•           Romi Konknnichea mollar, Romi Konknnichi avodd aslolim ani Romi Konknni kodde veg-vegllie ritin som’bond aslolim kholaien chintpi ani vichar korpi, gozali somzopi mon’xam asat, tannim-i aplea tonddank thalim marliant.            
 
•           Romi Konknnichea mollar, ti-ti podvi hatant asloleanche kuxin-kuxin zome (groupism) asat. Dekun, Romi Konknnichea mollar apnnak aslolea hok’kan ani promannikponnan konnui kitem-i korunk fuddem sorta tednam, zomeamni vanttun gelolim mon’xam ‘to konnacho/ ti konnachi /tem konnachem monis’ hacho poilo vas gheunk bhonvtat. Taka lagun Romi Konknnichea mon’xam modem ekvott disonam, punn duspott mat khub dista. 
 
•           Romi Konknnichea mollar, sonvsthanchea panvddear podvier asloleank dhorun tem sokoilea panvddear asloleam modem xime bhair nirdukai vo nattkai vosta. Dekun, hea mollar konnakui koslem-i zoit mell’lem zalear dusreak tachi jirvonn zainam. Dekun, Romi Konknnichea mollar konnachea-i koslea-i zoitachi bori khobor aikoli vo polleli zalear Romi Konknni mollavele monis, khoinchiech ritin tachi nond ghenant, ani tantuntlean apnnak Romi Konknnichem poddlolench nam mhonn thavem kortat.
 
•           Romi Konknnichea mollar, varem marta tie vatten sup dhorpi dhoronn pallpi monis chanttie-pavlak melltat. Romi lipiechea misanvak hem dhoronn khubuch mharog poddlam.
 
•           Romi Konknnichea mellot tea mon’xak aple fuddle 16 dant disum porian hanspi, ani fattlean 16 inchanchi suri top’pi xirle-i Romi Konknnichie udorgotik mharog poddleat.
 
•           Romi Konknnichea mollar “Tum aslear hanv nam, ani hanv aslear tum nam” sonvskrutai cholta.
 
Voilea karonnank lagun, Romi Konknnichie udorgtichie vatter addkholliche fator zaun Romi Konknni mon’xanch ubim ravliant mhonnlear chuk zait? Vo, poilie-voilie suvater, Romi Konknnichim mon’xanch Romi Konknnichim poilim dusmanam mhonnlear kitem-i addkhollot? – Sonnvarachim Sungttam         

Back
No comments posted...
Leave a Comment
* Name
* Email (will not be published)
*
* Enter verification code
* - Required Fields